• O cambio de pavimento con pedras de cantería compleméntase coa renovación de acometidas e pluviais

• Continúan agora coa mellora nas redes de abastecemento e saneamento na rúa Traviesas

• A Consellería de Emprego e Igualdade financia con 346.946 euros a formación de 20 persoas dos tres concellos da comarca do Sar

O alcalde de Padrón, Antonio Fernández Angueira, e o concelleiro de Obras, José Ramón Pardo, supervisaron o remate das obras realizadas polo alumnado do obradoiro dual de emprego Comarca do Sar 2021, que veñen de colocar unha nova pavimentación na rúa Ferreiros e a súa comunicación ata a rúa longa, utilizando pedras de cantería. Agora continúan coa renovación na rede de abastecemento e saneamento na rúa Traviesas, que comunica a N-550 coa rúa Real.

Os traballos comezaron a principios deste ano na rúa Ferreiros, na que o alumnado traballador levantou as lousas existentes na rúa para colocar unhas novas pedras. Técnicos municipais supervisaron os traballos en todo momento, xa que no casco histórico de Padrón é habitual descubrir restos arqueolóxicos, para que os traballos respectaran a normativa de Patrimonio. 

Durante estas tarefas, en colaboración co Concello e coa empresa que xestiona a traída de augas, cambiáronse tamén algunhas acometidas de auga, así como a saídas de fecais e pluviais, para deixar toda a rúa en condicións óptimas.

O obradoiro dual de emprego Comarca do Sar está financiado pola consellería de Emprego e Igualdade cunha achega de 346.946 euros. Nel estanse a formar 20 persoas desempregadas dos concellos de Padrón, Rois e Dodro. Este obradoiro ten dúas modalidades: actividades auxiliares en conservación e mellora de montes (con 10 persoas formándose) e o de operacións auxiliares de acabados ríxidos e urbanización (con  outras 10 persoas). 

É precisamente esta segunda especialidade a que está a mellorar e cambiar o enlousado de diferentes rúas do casco histórico de Padrón. Rematados os traballos na rúa Ferreiros e a conexión coa rúa Longa, agora comezan coa renovación nas redes de abastecemento e saneamento na rúa Traviesas, tamén coñecida como calexa do Cuco (entre a N-550 e a rúa Real).

Este obradoiro dual de emprego rematará a mediados de xullo deste ano. O concelleiro de Obras, José Ramón Pardo, conta con que os  traballos avancen a bo ritmo para poder cambiar o enlousado na rúa Fondo da Vila. Pardo Andrade xa adianta que o Concello de Padrón “vaille solicitar á Consellería outro obradoiro de emprego para continuar coa formación de persoas desempregadas do municipio e da comarca, xa que estas iniciativas son unha boa ferramenta para que se poidan incorporar ao mercado laboral. Ademais, permitiríanos seguir mellorando as rúas e a imaxe do casco histórico de Padrón”, asegura o tenente de alcalde.

Ademais destas actuacións no casco histórico, o alumnado-traballador que se forman en actividades auxiliares en conservación e mellora de montes xa estiveron acondicionando e ampliando a franxa de seguridade nos accesos ao monte San Gregorio. Nesta zona fixeron tarefas de desbroce, limpeza e tala para ampliar os metros de seguridade contra incendios ao carón do camiño de acceso ao monte do Santiaguiño.

Outro proxecto conxunto dos tres concellos

O alcalde Antonio Fernández Angueira, destaca a importancia da colaboración entre os concellos de Padrón, Rois e Dodro “para seguir mellorando a calidade da veciñanza e para poder acometer proxectos que, de xeito individual, sería inviable ou moito máis difícil”.

O alumnado traballador do obradoiro dual de emprego Comarca do Sar 2021 está a acometer melloras tamén nos concellos de Rois e Dodro. Entre outras actuacións, en Rois están a acondicionar os entornos do local de veciños de Sorribas, da escola unitaria de Sorribas ou na dos Dices. En Dodro realiza melloras en diversas pistas forestais e no entorno dos hórreos de Lavandeira, Imo e Dodro.