• Alcalde e equipo de goberno reuníronse con representantes do GES, Policía Local e departamento de obras para coordinar as actuacións  ||  

• “Arranxaremos os danos o antes posible”, sinala Anxo Arca, que agradece a implicación do persoal municipal e a comprensión da veciñanza  ||  

O alcalde de Padrón, Anxo Arca, convocou este martes unha reunión extraordinaria do Goberno Municipal con representantes da Policía Local, GES e do departamento municipal de obras para establecer “un plan de traballo que permita reparar canto antes os danos causados polos sucesivos temporais das últimas semanas”.

Sobre a mesa estiveron a reposición de múltiples puntos de luz da rede de iluminación pública, e o importante deterioro das estradas municipais, na que se formaron múltiples fochancas. A revisión dos semáforos e da sinalización viaria vertical, a desaparición de numerosas marcas viarias horizontais que necesitan ser repintadas, ou a aparición de goteiras e danos en cubertas de edificios e instalacións deportivas municipais foron outros dos puntos analizados na reunión, que se celebrou no salón de plenos.

“Arranxaremos todas as deficiencias causadas polos temporais o máis rápido posible, tan pronto como o tempo no lo permita”, asegurou Anxo Arca. Para estas actuacións, “contarase con persoal municipal e tamén con empresas, porque é moito o traballo que debemos realizar”, engadiu. O alcalde é conscientes de que estes gastos non previstos suporán un esforzo económico importante para o concello, “pero debemos asumilos”. 

O tempo necesario para acometer estas obras e recuperar a normalidade, “dependerá das condicións meteorolóxicas, posto que hai tarefas que requiren dun tempo seco e un terreo enxoito. Tamén da dispoñibilidade das empresas, que serán demandadas non só polo Concello, senón tamén por moitos particulares que sufriron danos nos seus domicilios, polo que terán que repartirse e ir sacando o traballo conforme vaia sendo posible”, resaltou.

O alcalde pide “un pouco de paciencia e de comprensión ante situación, porque recuperarse deste período de tanto desgaste vai levar un tempo”. Anxo Arca agradece a implicación de todo o persoal municipal, que estivo traballando en condicións moi adversas, e tamén a comprensión da veciñanza padronesa, “que mantivo a calma e evitou situacións de risco innecesarias”.

Ademais de arranxar as estradas e mobiliario municipal, o Concello de Padrón “volverá a solicitarlle ao Ministerio de Transportes unha mellora do firme e da sinalización da estrada N-550 ao seu paso polo municipio, especialmente no que respecta á visibilidade dos pasos de peóns”, conclúe Anxo Arca.