• A carreira terá lugar o mércores 31 de decembro ás 17.00 horas

• O propósito principal desta proba non competitiva é recoller alimentos para as familias máis necesitadas

• As inscricións realizaranse no paseo do Espolón entre as 15.45 horas e 10 minutos antes do inicio

• Ao finalizar, todos os participantes serán agasallados cun chocolate con churros

O Concello de Padrón convoca un ano máis á veciñanza a participar na San Silvestre Padronesa, unha carreira non competitiva, solidaria e aberta a todas as idades, que terá lugar o mércores 31 de decembro ás 17.00 horas.

O percorrido, de aproximadamente 5,7 quilómetros, comezará no paseo do Espolón, que tamén será o punto de inscrición. A proba pode completarse camiñando, correndo ou en bicicleta, fomentando a participación familiar, e as persoas menores deberán ir sempre acompañadas dun adulto responsable.

As inscricións realizaranse no mesmo Paseo do Espolón entre as 15.45 horas e 10 minutos antes do inicio. Cada participante deberá entregar un quilo de alimento non perecedoiro, que será destinado a entidades sociais do municipio, reforzando así o carácter solidario da cita. Ao finalizar a carreira, todos os participantes serán agasallados cun chocolate con churros, consolidando unha tradición que une deporte, convivencia e celebración para pechar o ano.

A San Silvestre Padronesa está organizada polo Concello de Padrón, coa colaboración de Cáritas Padrón, o Club Ciclista Padronés Cortizo, Protección Civil de Padrón e a Deputación da Coruña.

Esta cita deportiva reflicte o compromiso do Concello coa promoción do deporte, a vida saudable e a participación veciñal, enmarcándose na programación de Nadal do municipio. O Concello anima á veciñanza a sumarse a esta actividade que cada ano reúne centos de persoas e contribúe a crear un ambiente festivo, solidario e comunitario.

Para máis información, as persoas interesadas poden contactar coa Oficina de Deportes do Centro Social no teléfono 981 811 329.

Consulta o regulamento premendo neste enlace. 

Repasa o percorrido desta edición neste plano.