• O alcalde destaca a implicación de institucións e iniciativas privadas para preservar o patrimonio da vila

• Anxo Arca, o párroco Roberto Martínez, o director territorial da Consellería de Cultura Severino Álvarez, concelleiros e concelleiras do goberno e a Corporación acompañaron á delegada da Xunta na provincia da Coruña na súa visita ao templo

• A actuación no retablo conta cun orzamento de 98.000 euros

O alcalde de Padrón, Anxo Arca, encabezou a comitiva do goberno local que acompañou esta mañá á delegada territorial da Xunta na provincia da Coruña, Belén do Campo, na visita que fixo á igrexa parroquial de Santiago e na que anunciou que o Goberno galego vén de licitar a restauración do retablo maior, actuación que conta cun orzamento de 98.000 euros. As empresas poderán presentar agora as súas ofertas ata o vindeiro 3 de novembro e contarán cun prazo de execución de seis meses dende a sinatura do contrato.

Durante a visita —na que tamén participou o director territorial da Consellería de Cultura na provincia da Coruña, Severino Álvarez— o alcalde de Padrón destacou a relevancia desta intervención. Anxo Arca recordou que a igrexa de Santiago é o espazo arquitectónico máis visitado da localidade polos seus vínculos coa tradición xacobea e subliñou que “esta restauración do retablo se suma ás  obras de renovación da cuberta, que foron financiadas por un empresario padronés e que contaron coa máxima colaboración do Concello co obxectivo de que este elemento patrimonial acade un estado óptimo de conservación”.

Neste sentido, o rexedor agradeceu a colaboración tanto das distintas administracións como de promotores privados para preservar o patrimonio relixioso e histórico da vila, e reforzou o compromiso do goberno local para que Padrón presente a súa mellor cara no vindeiro xacobeo. “Coa vista posta no Ano Santo de 2027, é importante que todas as institucións colaboren para que os camiños de Santiago se atopen nas mellores condicións, o que inclúe o coidado dos diferentes elementos que compoñen o noso patrimonio histórico”, sinalou Anxo Arca.

A igrexa de Santiago é un dos espazos máis emblemáticos de Padrón, ligado directamente á tradición xacobea como lugar onde se custodia o pedrón que, segundo a tradición, serviu para amarrar a barca na que chegou o corpo do Apóstolo Santiago procedente de Palestina. Trátase dun dos principais puntos de parada para os peregrinos que percorren o Camiño Portugués e un símbolo da identidade cultural e relixiosa da vila.