• O bo tempo e a ampla oferta de actividades foron un reclamo para os centos de persoas que gozaron das diferentes propostas

• A veciñanza e os visitantes desfrutaron dos postos de artesanía e de produtos de proximidade situados entre a rúa Longa e a praza da Igualdade 

• A troula veu de man da música en directo coas DJ Riquinha e  Bonita&Sabrosa o Grupo Dalsi

O bo tempo acompañou á celebración este sábado do mercado ‘Voces Delas’ no Concello de Padrón. Esta cita, incluída dentro do programa elaborado pola Concellería de Igualdade e o CIM para conmemorar o Día Internacional da Muller, contou cunha extraordinaria resposta tanto pola veciñanza como polos moitos visitantes que gozaron dunha xornada chea de música, obradoiros e a venda de produtos de artesanía.

A concelleira de Muller e Igualdade, Mariló Saco, foi a encargada de ler o manifesto institucional e insistiu “na chamada á acción para empoderar ás mulleres de todas as idades e en todos os ámbitos da vida”. A edil afirma que só “con valentía e traballando xuntas poderase lograr un mundo máis inclusivo e equitativo”. “O compromiso debe ser individual pero tamén colectivo como sociedade”, engadiu Mariló Saco. Tamén tomaron a palabra Alba, integrante da ONG Aphoteca “enfocada á economía social que busca conectar con persoas que usan o seu traballo para proxectar un sentimento de solidariedade e amor cara os seus veciños”, así como Chus Iglesias. A fundadora da Asociación Paluso recordou que o obxectivo da súa asociación é “axudar a persoas en situación de vulnerabilidade social a aliviar a dureza das súas circunstancias repartindo alimentos cada semana ou mesmo roupa, pero sobre todo cariño e compañía”.

O acto contou coa presenza do alcalde, Anxo Arca, e dos concelleiros Luis Mariño e Ana Castro.

Son moitas as mulleres que amosaron o seu talento e creatividade nun percorrido que abarcou dende a rúa Longa ata a praza da Igualdade durante toda a xornada. A música e o baile acompañaron tamén durante todo o día de mercado, con actuacións en diferentes emprazamentos. A sesión vermú estivo a cargo da DJ Riquinha e, xa pola tarde, foi a quenda do Grupo Dalsi e da DJ Bonita&Sabrosa na praza da Igualdade.

Esta homenaxe ás mulleres en Padrón incluíu ademais os obradoiros ‘Dálle volta ao cubo’ coa finalidade de que os menores aprendan a crear diferentes historias que racharán cos roles de xénero instaurados e ‘Danza Río Aberto: movemento vital expresivo’ impartido pola terapeuta gestalt e bailarina Martha Franco.