O alcalde de Padrón, Antonio Fernández Angueira, reuniuse esta semana no Ministerio de Fomento co director xeral de Carreteras, Jorge Urrecho Corrales, para urxir a execución do proxecto de mellora da travesía da estrada N-550, que comprende a avenida de Pontecesures desde a ponte sobre o río Ulla e a parte inicial da avenida de Compostela.

Fernández Angueira, que aproveitou a súa viaxe a Madrid para presentar na Feira Internacional de Turismo (Fitur) a ruta "As pegadas de Rosalía", acudiu á reunión acompañado polo concelleiro de Obras, José Ramón Pardo, e pola deputada popular pola provincia da Coruña Marta González.

No encontro, o rexedor trasladoulle a Jorge Urrecho a necesidade de acometer canto antes, "por cuestións de seguridade vial e tamén para mellorar a imaxe de Padrón", o acondicionamento da entrada ao pobo "pola que chegan cada ano milleiros de peregrinos que percorren o Camiño Portugués".

Aínda coñecendo as limitacións orzamentarias, o alcalde indicoulle ao director xeral de Carreteras que este proxecto é "absolutamente prioritario" para Padrón e lembroulle que trátase dunha actuación nun treito de pouco máis de 1,2 quilómetros de lonxitude e que tería un orzamento lixeiramente superior aos 4 millóns de euros.

Ao respecto, precisou que durante a época de Ana Pastor como ministra de Fomento xa se acometera unha parte inicial deste proxecto, consistente no derrubamento dalgunhas casas, cun investimento aproximado de 500.000 euros.