-
A calidade dos expositores e a afluencia de visitantes marcan o certame celebrado no Convento do Carme
-
O alcalde Anxo Arca e a corporación municipal participaron na inauguración e na entrega de galardóns
-
José Freire, organizador da expofeira, anunciou a creación dunha nova categoría na próxima edición: as camelias rexistradas en Galicia
O Convento do Carme acolleu esta fin de semana a oitava edición da Exposición da camelia e do bonsái coa participación dun total de 34 expositores que completaron o aforo e a visita de centos de persoas. O bo tempo e a singularidade da mostra organizada polo Concello de Padrón foron claves para o éxito desta expofeira que contou tamén cunha ampla programación de actividades divulgativas.
Dende as 9.30 horas do sábado, momento no que os expositores comezaron a colocar as flores, ata o seu peche o domingo ás 19.00 horas, o certame rexistrou un ir e vir constante de xente atraída pola beleza das camelias e dos bonsáis e polos diferentes obradoiros e talleres que se impartiron.
Juan Liñares, especialista en diferentes técnicas e coidados, foi o encargado de detallar as peculiaridades dos bonsáis mentres que a demostración de ‘Home Jungle Plants. Xardíns eternos e kokedamas’ descubriu aos participantes as características destes terrarios únicos. Edmundo Novoa, pola súa banda, levou a cabo un talleres sobre cactus e crasas.
O certame incluíu ademais a mostra de exemplares a cargo de José Freire e de Luis Baiño, un dos principais afeccionados aos bonsáis de España e que posúe unha das mellores coleccións de Europa.
O alcalde de Padrón, Anxo Arca, foi o encargado de inaugurar a exposición cunha intervención na que confirmou o máximo apoio por parte do goberno local á realización desta mostra. O rexedor confesou a súa admiración polo traballo que desenvolven as persoas expositoras e demostrou o seu coñecemento sobre estas especies, pois el mesmo conta con dous bonsáis.
O acto foi presentado por José Freire, organizador da exposición, quen anuncio que na próxima edición incluirase unha nova categoría de premio: as camelias rexistradas en Galicia. Tamén participaron as concelleiras Mariló Saco Vigo e Ana Castro, así como a vogal da Sociedade Española da Camelia, Elena Nogueira, e de Edmundo Novoa, da Asociación Galega da Camelia.
Entrega de premios
A entrega de premios foi una no máis o momento máis esperado por todos os participantes xa pola tarde. Os gañadores nas diferentes categorías foron:
Terras de Iria: Isolina Campos (Valga),
Camelia do Sar: Ana Rodríguez (Valga),
Camelia reticulata: Clara Abalo (Rois),
Camelia xapónica: Carmen Moldes e Juan Castro,
Camelia híbrida: Ana Fernández (Porriño)
e a Outras especies de camelia: Rosa Crespo e Jaime Escofet.
Os galardón foron entregados polo alcalde Anxo Arca e os membros da corporación municipal Chus Campos, Ana Castro, Mariló Saco Vigo e Laura Horta.
Xa o domingo continuou a mostra dende as 10.00 horas con novos obradoiro como o de elaboración de conservas artesanais impartido por Carme Freire ou o taller de poda e de froiteiras da man do profesor Afonso Touceda. Foron moitas as persoas que tamén gozaron nesta última xornada coa visita guiada dirixida e comentada por José Freire, organizador da exposición, quen comentou as diferentes variedades e o cultivo das camelias e dos bonsáis expostos.
Durante estes dous días, o Convento do Carme acolleu tamén dúas exposicións permanentes, unha con diferentes esculturas do artista Camilo Seira, e outra de pintura a cargo do alumnado de Ategal Padrón.