• Alcalde e concelleira de Cultura destacan o alto nivel de participación desta edición e a creatividade das decoracións //

• Na categoría de establecementos, o restaurante Mundos e o salón de peiteado canino Vaia Pelos, álzanse co segundo e terceiro premio //

• A EEI de Pontecesures leva o segundo premio á decoración realizada por centros educativos //

O alcalde de Padrón, Antonio Fernández Angueira, e a concelleira de Cultura, Lorena Couso, entregaron o pasado martes, 20 de decembro, os premios do concurso de decoracións Nadal na rúa 2022 aos gañadores desta edición. Os vencedores indiscutibles desta edición foron o café bar Século XX (na categoría de establecementos e locais de hostalería, e a Escola de Educación Infantil (EEI) da Escravitude (na categoría de asociacións sen ánimo de lucro, entidades culturais e centros educativos), que recibiu un vale por valor de 200 €. 

Segundo o fallo do xurado, o segundo e o terceiro premio na categoría de establecementos e locais de hostalería foi para o restaurante Mundos (150 €) e para o salón de peiteado canino Vaia Pelos (100 €), respectivamente.

Mentres que o segundo na categoría de decoración realizada por asociacións sen ánimo de lucro, colectivos, entidades culturais ou centros educativos, dotado con 100 €, recaeu na Escola de Educación Infantil de Pontecesures.

Antonio Fernández Angueira destacou o alto nivel de participación este ano na modalidade de establecementos e locais de hostalería con 15 participantes, así como a participación de catro centros escolares: as EEI de Extramundi de Arriba, A Escravitude e Pontecesures e a Escola Infantil Municipal Pequenos escolares.

“Estamos moi satisfeito co nivel de participación desta edición e a creatividade aplicada nas  decoracións”, remarca o alcalde, engadido que “esperemos que ano a ano a participación neste concurso vaia a máis e se siga decorando Padrón nestas datas”. O alcalde tamén indicou que “este xeito de traballar en conxunto sempre da moi bos resultados”.

Pola súa banda, a concelleira de Cultura, Lorena Couso, quixo destacar a participación dos centros educativos de Padrón nesta iniciativa e agradecer ás familias “o traballo que fan para que as escolas estean tan fermosas nestas datas. Sen a implicación das nais e dos pais das crianzas isto non sería posible”, subliña Lorena Couso.

 Na valoración das decoracións, o xurado tivo en conta a orixinalidade e/ou creatividade na ornamentación, a inclusión de identidade local e o emprego de materiais de refugallo.

Compre subliñar que as contías dos premios deberán ser consumidas no comercio e na hostalería local. As persoas gañadoras terán ata o 30 de xaneiro de 2023 para realizar o gasto e presentar os recibos das súas compras na Oficina de Turismo.

As fotos dos participantes no concurso poden verse neste enlace