• Convida á veciñanza a sumarse á campaña de sensibilización facéndose unha foto e subíndoa ás redes sociais //

O Concello de Padrón conmemora o Día Mundial do  Autismo sumándose un ano máis á campaña Ilumina de Azul, que convida a tinguir de azul edificios e monumentos emblemáticos de todo o mundo para visibilizar como mostra de apoio e solidariedade co colectivo de persoas con trastorno do espectro autista (TEA) e coas súas familias.

A Casa do Concello, o edificio de Servizos Sociais, a estatua de Rosalía de Castro no  Espolón, A Pementeira e A Semilleira serán os monumentos que se iluminen de azul en Padrón. Trátase dun xeito de visibilizar ás persoas con autismo e incrementar o coñecemento e a tolerancia cara a elas, ademais de celebrar o seu talento e capacidades e chamar a atención sobre as necesidades que teñen.

O Concello de Padrón convida a toda a veciñanza a participar na campaña de sensibilización, facéndose unha foto xunto a un dos monumentos iluminados para despois compatila en Instagram ou Twitter cos hashtags #IluminadeAzul e #DiaMundialAutismo.