-
A actividade de conciliación desenvolverase no Convento de Herbón e terá temática medieval ||
-
Os menores adentraranse nas diversas actividades da man de dous personaxes singulares: Frei Estradón e o Bardo Bernardo ||
-
O programa, dirixido a nenos e nenas de 6 a 12 anos, desenvolverase do 4 ao 17 de agosto ||
O Concello de Padrón ven de abrir as inscricións para o Campamento Urbán 2022, que se desenvolverá do 4 ao 17 de agosto nas instalacións do Convento de Herbón. Nesta ocasión, o programa de conciliación dirixido a nenos e nenas do municipio de 6 a 12 anos, levará aos menores á Idade Media.
Da man de dous personaxes singulares, Frei Estradón e o Bardo Bernardo, as rapazas e os rapaces, percorrerán o convento franciscano e realizarán diversas actividades con temática medieval. Entre estas destacan, obradoiros de cociña na que elaborarán receitas medievais; obradoiros artísticos de armaduras, escudos, espadas e complementos varios; animación á lectura con criaturas fantásticas e da mitoloxía popular galega; obradoiro de heráldicas e bandeiras; xogos de pistas ou bailes musicais galegos, entre outros.
Os nenos e as nenas tamén levarán a cabo rutas exteriores pola contorna do río Ulla, desfrutaran de pases de películas e ludoteca. Todo un programa de actividades pensado para vivir, sentir e viaxar na historia e, sobre todo, para gozar.
O Campamento urbán 2022 desenvolverase de luns a venres en horario de 9.00 horas a 14.00 horas.
As persoas interesadas deberán formalizar a súa inscrición nas dependencias municipais, en horario de oficina, de 9.00 a 14.00 horas. Para máis información, chamar ao teléfono 981 810 451.