A Escola de Música Municipal de Padrón pechou onte pola tarde o presente curso escolar cun festival. Polo escenario do auditorio municipal pasou unha representación dos máis de sesenta alumnos e alumnas que se formaron ao longo dos pasados meses amosando o traballo realizado nas distintas disciplinas. 

Para moitas das rapazas e dos rapaces a de onte foi a primeira que se subían a un escenario e que actuaban ante o público. A emoción, os nervios e a ilusión estiveron presentes durante todo o acto. O alumnado veu recompensado o seu bo facer cos aplausos dun público entregado, entre os que se atopaban, en representación do goberno municipal, a concelleira de Cultura, Lorena Couso, e o edil de Relacións Veciñais, Francisco García Dios.

O festival de fin de curso da Escola de Música Municipal de Padrón comezou coa actuación dos máis cativos e cativas, o alumnado de música e movemento. A continuación pasaron os de frauta, oboe, saxo, piano, trompeta, trompa, metal grave e, finalmente, percusión. Pechou o festival a Banda Xuvenil da Escola de Música.