O delegado da Xunta na Coruña, Gonzalo Trenor, e o alcalde de Padrón, Antonio Fernández Angueira, visitaron esta mañá a Oficina Agraria Comarcal de Padrón, onde se está executando unha actuación de mellora integral que conta cun orzamento próximo aos 50.000 euros. Entre as actuacións que se están levando a cabo destacan a renovación da carpintería interior e de toda a pintura de paredes e teitos. Ademais, está previsto o cambio de todo o alumeado para lograr unha maior eficiencia enerxética no edificio.

Ademais, estase executando unha reforma integral no aseo dos veterinarios xunto cunha reordenación dos espazos para habilitar unha nova zona administrativa que permita ofrecer unha atención máis directa e ampla. O proxecto tamén contempla un trasdosado na fachada norte e leste da primeira planta para mellorar as condicións térmicas do inmoble. Finalmente, estase levando a cabo tamén a renovación da instalación eléctrica existente para dar un adecuado servizo adaptado ás necesidades de persoal existentes.

Plan integral

O delegado da Xunta recalcou que estas actuacións se enmarcan no Plan integral de reestruturación e optimización das oficinas agrarias comarcais iniciado pola Xunta, que inclúe tanto actuacións de optimización de tipo organizativo e funcional, como de mellora das infraestruturas e da dotación das oficinas. Os obxectivos fundamentais deste plan son, por unha parte, dar unha resposta óptima ás demandas actuais da poboación rural en relación aos servizos públicos e, ao mesmo tempo, mellorar as condicións laborais das persoas empregadas públicas que desenvolven as súas tarefas nas ditas oficinas, o que repercute positivamente na relación entre a Xunta de Galicia e o sector primario.