O alcalde de Padrón, Antonio Fernández Angueira, a concelleira de Cultura e Turismo,  Lorena Couso, a directora xeral de Turismo de Galicia, Nava Castro, e Isaías Calvo, Director de Relacións coas Asociacións do Camiño, inauguraron este sábado a mostra `Kumano Kodo. Camiño de peregrinación’. A exposición fotográfica componse de 37 fotografías en color e branco e negro dos fotógrafos Luis Gago e Aoife Ni Dhubhda. As imaxes foron tomadas en Wakayama en Xapón no outono de 2017 e na primaveira de 2018 cando percorreron a rede de camiños coñecida como Kumano Kodo. A mostra, por tanto, busca achegar a beleza das terras e xentes do Kumano Kodo á cidadanía galega. Galicia e Wakayama están unidas por un acordo de 1998, e en ambas rexións atopanse as rutas de peregrinación máis antigas do mundo declaradas Patrimonio Mundial pola UNESCO. A mostra poderase visitar na sede da Fundación Camilo José Cela en Padrón ata o mes de abril. 

Neste contexto, Antonio Fernández Angueira destacou o potencial da Pedronía como reclamo turístico complementario ao Camiño de Santiago, “a Pedronía ten cada vez máis éxito, e son máis as persoas que deciden percorrer as terras de Iría Flavia para completar a súa experiencia en Galicia. Os 18 km hasta Padrón dende Santiago ou algunha das localidades da Ría de Arousa amosan aos visitantes a grandeza do noso patrimonio. En definitiva, non podemos estar máis orgullosos de formar parte deste proxecto universal”, asegurou o alcalde. 

Pola súa parte, Nava Castro, explicou que a intención do goberno galego é seguir reforzando os vínculos con Xapón para seguir promovendo o destino galego e a cultura xacobea nun dos países que máis está crecendo en número de peregrinos nos últimos exercicios, cun aumento do 82% dende o último Ano Santo.

Premio de Narrativa Camilo José Cela
Na mesma xornada entregouse o premio de Narrativa Camilo José Cela á obra ‘Las damas del canapé’, de Juán Carlos Fernández León, un profesor que reside en Madrid, e que recibiu 1.500 euros e unha estatuilla de Cela como premio. O xurado elixiu esta obra por unanimidade entre un total de 148 relatos presentados. Valoraron a orixinalidade e estrutura do traballo premiado, de feito destacaron “a descarada voz narrativa que rompe as fronteiras do relato para dirixirse a un xurado real ao que provoca, esixe e orienta na necesidade da situación idónea para comprender calquera experiencia de lectura”. O galardón literario convocado pola concellería de Cultura do Concello de Padrón  cumpría 30 anos.

E como broche final a unha tarde adicada por completo á cultura, o trío Xacobe Martínez Trío ofreceu un concerto para todos os asistentes aos actos celebrados no Museo Camilo José Cela na vila padronesa.