-
O Concello elaborou unha ampla oferta cultural e de ocio do 17 de decembro ao 14 de xaneiro //
-
Lorena Couso: “Queremos dinamizar o Nadal con actividades na vila e polas parroquias, pensadas para gozar en familia e involucrando á veciñanza en xeral” //
-
Papá Noel visitará os centros educativos os días 19 e 20 de decembro, e o día 23 estará na praza de Macías //
-
O ‘Nadal rula por Padrón’ é a novidade deste ano encamiñada a descentralizar a actividade achegándoa ao rural //
O Concello de Padrón vén de presentar a programación de Nadal que abrangue unha ampla oferta de actividades culturais e de ocio, totalmente gratuítas, cunha clara aposta pola música, os obradoiros e o teatro e que na que non faltan a tradicional visita de Papá Noel aos centros educativos ou á praza de Macías e a tradicional Cabalgata de Reis. A novidade deste ano vén da man da actividade do Nadal rula por Padrón, coa que o Concello quere facer partícipes a toda a veciñanza do municipio, descentralizando a actividade e achegándoa ao rural padronés. A programación, aberta a todos os públicos e pensada para gozar en familia, desenvolverase do 17 de decembro ao 14 de xaneiro.
Segundo explica a concelleira de Cultura de Padrón, Lorena Couso, “queremos dinamizar o Nadal e fixemos unha programación aberta a todos os públicos pero pensada tamén para gozar en familia”, engadindo que “un dos obxectivos prioritarios do goberno padronés é facer tamén partícipes á veciñanza das parroquias e por iso tamén este Nadal levamos as actividades ao rural”, recalca.
Lorena Couso subliña que “esta ampla oferta cultural e de ocio que presentamos, xunto coa campaña de decoración de escaparates, balcóns e fachadas que temos en marcha animará e dinamizará este Nadal facendo de Padrón un pobo máis atractivo para a veciñanza e para os visitantes”.
O Concerto de Panxoliñas abrirá o 17 de decembro os actos programados para este Nadal en Padrón. Terá como escenario o auditorio municipal (19.00 horas) e nela participarán a Coral Polifónica de Betanzos; a Coral Avogados de Pontevedra e a Coral Polifónica Padronesa.
A música seguirá sendo a protagonista o domingo 18 de decembro, xornada na que terá lugar o Concerto de Nadal a cargo da Banda de Música Municipal de Padrón.
Unha das visitas máis esperadas desta época do ano é a de Papá Noel, que percorrerá os centros educativos de infantil e primaria de Padrón os días 19 e 20 de decembro, recollendo as peticións das nenas e dos nenos e pasando con eles un anaco agradable. A recepción que este singular personaxe que lle ofrece aos máis pequeno terá lugar o venres 23 de decembro, na praza de Macías, de 18.00 a 20.00 horas.
Do 26 ao 29 de decembro e do 2 ao 4 de xaneiro desenvolverase a iniciativa cultural e de ocio O Nadal rula por Padrón. Trátase dunha serie de talleres e actividades pensadas para toda a familia que se desenvolverán en horario de mañá, na Escravitude, Pazos, Arretén, Extramundi, Carcacia, Herbón e A Ponte. Para poder participar é necesario inscribirse no centro social a partir do luns día 12.
O luns 26 de decembro, Raquel Queizás visitará Padrón para presentar o seu espectáculo de narración oral O xogo de Nano dirixido ás crianzas de 0 a 4 anos. Será no autidorio munipal, ás 18.00 horas, con entrada libre ata completar aforo.
Da man dos Bolechas chegará o 29 de decembro ao auditorio padronés A Bruxa Befana (18.00 horas), un espectáculo para toda a familia que conta unha trepidante aventura chea de emocións.
Pecharán a programación de Nadal en Padrón a Cabalgata de Reis, o 5 de xaneiro,o tradicional Concerto de Reis, a cargo da Banda de Música Municipal de Padrón, o 6 de xaneiro (19.00 horas, no auditorio municipal) e o 14 de xaneiro o concerto da Orquestra de Cámara Galega (19.00 horas, no auditorio).